Svínka

Takk takk takk takk allir fyrir æðislegan dag - hiklaust sá besti sem ég hef upplifað. Takk líka fyrir allar gjafirnar, það var nú alveg óþarfi að tæma veskið alveg eins og flestir virðast hafa gert. Núna get ég sko aldeilis haldið matarboð með nýja fína stellið mitt og glösin. Svo fengum við líka helling af skrautmunum og tækjum - frystikistan og hrærivélin eiga sko aldeilis eftir að koma að góðum notum - nú er eins gott að mín fari að vera dugleg að elda og baka, ég hef enga afsökun lengur. Svo fengum við meira í safnið af húsgögnum en pabbi hans Elfars smíðaði handa okkur þvílíkt flottan kistil - það var víst unnið langt fram á nætur við að reyna að klára hann. Jæja víst að ég hef loksins fengið smá tíma til þess að blogga (er í vinnunni :)) þá ætla ég að reyna að rekja aðeins daginn sjálfan og kannski aðeins dagana fyrir því ég vil nú ekki gleyma neinu sem gerðist á þessum frábæra degi. Ég er nefnilega að fara út á morgun og verð í alveg fjórar vikur þ.a. ég á nú ekki eftir að blogga mikið á næstunni, það er ekki einu sinni víst að ég eigi eftir að blogga neitt - það verður allaveganna ekki ofarlega á forgangsröðinni :) Við erum sem sagt að fara til danmerkur fyrst - en þar ætlum við að stoppa þrjá daga hjá pabba í Köben (ásamt 4 öðrum í dansinum), svo förum við til Ærö þar sem við verðum í tvær vikur á svona danshátið þar sem við bæði lærum ýmislegt, kennum örugglega eitthvað og svo böll (fyrir utan annars konar skemmtun). Við verðum 13 krakkar frá Íslandi og einhverjir fullorðnir en allt í allt verða nokkur hundruð manns þarna - ég er ekki alveg viss á tölunni. Síðan förum við aftur til Köben og gistum þar bara eina nótt áður en við fljúgum til Ítalíu. Við fljúgum til Rómar og stoppum þar eitthvað, þaðan förum við til Flórens og Piza (?), svo liggur leiðin til feneyja (samt bara í dagsferð) og svo endum við í Milan. Þaðan fljúgum við til london en þar ætlum við ekkert að stoppa. Snill :)
Jæja aftur að brúðkaupinu:

Miðvikurdagur og fimmtudagur:
Alls konar reddingar í gangi - ég brunaði stanslaust milli búða báða dagana og gerði ýmislegt á síðustu stundu. T.d. keypti ég ekki brúðhjónaglösin fyrr en seinnipart fimmtudags :)Eftirminnilega var líka ferðin mín í bónus en þar sem ég hafði engan til að hjálpa mér þá þurfti að fara tvær ferðir að kassanum að borga vegna þess að ég kom ekki öllu dótinu í eina kerru enda keypti mín m.a. 7 kippur af gosi og tvær af cider - geri aðrir betur :)

Föstudagur:
Við vöknuðum snemma til að fara að skreyta salinn ásamt mínum yndislegu vinkonum og systur minni og Elfars. Það tók nú reyndar ekki langan tíma því mínar yndislegu vinkonur og ég (bara smá) voru búnar að brjóta saman allar servíetturnar og búa til servíettuhringi utan um þær. Þær, ásamt öllu því skrauti sem ég og Mæja vorum búnar að kaupa í sameiningu og skreytingarhæfileikum Mæju gerðu salinn bara þann flottasta sem ég hef nokkru sinni séð - ekki það að ég hafi mikla reynslu en samt VÁ! Ég var samt heillengi í salnum m.a. vegna þess að þegar allir skreytingarsnillingarnir voru farnir var eftir að skreyta brúðhjónaglösin þ.a. ég reyndi að redda því - reyndi er rétta orðið því ég hef nú alveg séð flottari glös. Restin af deginum fór í allskonar reddingar (sumar á síðustu stundu, t.d. pantaði ég skrautið á bílinn fyrst þá, konan sem sá um salinn gerði einmitt mikið grín af því hvað ég var skipulögð - já eða ekki :)), æfingu í kirkjunni og svo þrif á íbúðinni. Um kvöldið fór ég svo til mömmu því ég ætlaði að gista hjá henni en Elfar heima. Ég sofnaði vært í fallegu herbergi en mamma var búin að kaupa blóm og hengja kjólinn á fataskápinn þ.a. þetta var sú sýn sem ég sofnaði við :)

Laugardagur:
Ég vaknaði óvart kl 7 eftir að hafa sofið rosalega laust alla nóttina. Það var þó ekki stressið sem vakti mig heldur spenningurinn, ég bara gat ekki beðið :) Ég var vakandi í einn og hálfan tíma en náði svo aðeins að sofna aftur í eins og klukkutími áður en ég þurfti að vakna til að fara í hárgreiðslu og svona. Á sama tíma var Elfar heima að horfa á lost - hann gat ekki sofið heldur þ.a. hann byrjaði daginn á að horfa á þrjá þætti af lost á meðan vinkonur mínar að norðan voru að skreyta svefnherbergið :) Eftir hárgreiðsluna fór ég aftur heim til mömmu en þar var allt á fullu, mamma og Sölvi að baka, amma og afi að taka sig til, Ingólfur gerði allt sem hann var beðinn um, Mæja var að mála allar stelpurnar (þ.e. mig, mömmu og ömmu) ásamt því að reyna að taka sjálfa sig til. Þetta var samt alveg rosalega skemmtileg stemmning en sem betur fer voru allir farnir nema Mæja og Ingólfur þegar ég fór að koma mér í kjólinn. Við vorum ágætlega tímanlega í því en bara vegna þess að við flýttum okkur mjög mikið. Sem dæmi um það má nefna að ég var næstum því búin að gleyma undirpilsinu heima en án þess er kjóllinn frekar ómerkilegur og auðvitað alltof síður á mig. Mæja mundi bara allt í einu eftir því að við höfðum gleymt sjalinu sem ég hafði utan um mig milli staða heima og sá þá undirpilsið á rúminu - við vorum lengi í sjokki yfir því að við hefðum næstum því gleymt því.
Við vorum komin í kirkjuna svona 10 mínútur í 3 og þá fór ég inn í svona herbergi með spegli þar sem ég gat undirbúið mig. Ég var aldrei stressuð á þessu tímabili, ég hlakkaði bara til á meðan ég stóð og dáðist af kjólnum mínum og vendinum sem varð alveg fullkominn jafnvel þótt ég lýsti því bara fyrir konunni í búðinni hvernig ég vildi hafa hann. Pabbi var aðeins seinn þ.a. við gengum ekki inn gólfið fyrr en fimm yfir. Allan þennan tíma hafði ég bara áhyggjur af Elfari því hann var búin að ítreka það svo oft við mig að vera á réttum tíma því annars myndi hann pottþétt fara að efast um að ég myndi koma :) Ég lofaði honum nú samt bara að ég myndi mæta, treysti mér ekki til að lofa hinu því maður veit nú aldrei hvað getur komið upp á. Ég frétti reyndar síðar að hann hefði alveg verið rólegur því hann sá Ingólf og þar sem hann vissi að hann hefði skutlað mér þá vissi hann að ég væri komin. Athöfnin í kirkjunni var alveg æðisleg, ég var mjög afslöppuð og um leið og ég var komin upp til Elfars þá slakaði hann líka á. Presturinn og söngurinn var frábær, þetta var allt svo persónulegt. Hjörtur Magni, Miriam og Óskar voru þarna líka af því að þau vildu það, þau þökkuðu mér öll fyrir að leyfa þeim að taka þátt í þessu - já ég er svo góð :) Þetta finnst mér alveg lýsandi fyrir stemmninguna - ég bað þau um að gera mér greiða og þau þakka mér - það voru bara allir svo ánægðir með að vera þarna. Svo var athöfnin sjálf líka á léttu nótunum, ég skemmti mér bara mjög vel og þetta varð aldrei stíft. Tilfinningarnar voru líka á miklu flugi, ekki bara hjá okkur því það voru nú ansi margir snöktandi í salnum - svona á þetta að vera :)
Eftir athöfnina (og eftir að hafa verið drekkt í hrísgrjónum) fórum við í myndatökuna. Þetta voru nú aðallega innimyndir enda mikil rigning úti. Undir lokin fórum við reyndar út með regnhlíf og Stebbi smellti af okkur nokkrum myndum og þá var sko demba. Mæja hjálpaði einnig mikið til í myndatökinni og sá til þess að við litum vel út - svo er bara spurning hvernig útkoman verður :/
Eina svona virkilega vandræðalega mómentið var þegar við komum fyrst í veisluna. Þá biðu allir eftir okkur með glös og planið var að skála en eitthver misskilningur var milli mín og veislustjórans þ.a. enginn sagði neitt. Svo tók við mikið kysserí, það tekur nú bara á að kyssa 150 manns :) Mér fannst þetta eiginlega eini gallinn við hafa svona marga - ég fékk eiginlega engan tíma með hverjum og einum og suma sá bara varla en það samt æðislegt að hafa svona marga sem manni þykir vænt um á einum stað. Það komu líka allir sem skipta mig mestu máli og það finnst mér æðislegt. Anyways þá tók veislan við og hún heppnaðist alveg rosalega vel að mínu mati. Elli veislustjóri stóð sig alveg frábærlega og atriðin voru svo skemmtileg og ekki er verra hvað þau komu oft mikið á óvart. Það töluðu nú ekki margir en það kom mér svo sem ekkert á óvart þar sem það er nú ekki mikið af ræðuglöðu fólki í minni ætt eða Elfars og það sama gildir um vinahópinn. Addi bróðir, sá feimnasti af þeim öllum, hélt þó ræðu mér til mikillar undrunar og þessi líka snilldar ræða - hún hitti sko beint í mark :) Fyndin, skemmileg skot en líka svo falleg - í allan þann tíma sem mér hefur fundist Addi ekki vera mikið inn í hlutunum þá var hann með þetta allt á hreinu. Fyndnast fannst mér þó commentið hans um Elfar - best er að segja honum hvað hann á að gera en ekki hvernig hann á að gera það - vá hvað þetta er rétt hjá honum :) Mér finnst annars bara fínt að atriðin skyldu vera meira í svona videoformi. Brilliant video frá steggjuninni og æsku minni. Okkur langaði nú samt oft að hverfa ofan í stólinn. Mig langaði það sérstaklega þegar það var verið að sýna frá dansinum - úff. Söngurinn var allt í góðu af því að hann var í gríni gerður á þessum tíma (átti að vera óperusöngur :) og stelpurnar sungu líka en það var auðvitað klippt út) en ég er samt ekki viss um að allir gestirnir hafi áttað sig á því - það hlítur samt eiginlega að vera en eftir að hafa séð frá idolinu þá veit maður það svo sem aldrei hvað maður á að halda:)
Jæja ég hef eiginlega ekki tíma til að fara svona hægt yfir sögu. Eftir veisluna var svo dansað auðvitað. Fyrst brúðarvaldinn, svo show frá jógúrt, síðan allir gestirnir dregnir út á gólfið í boing og að lokum var frjáls dans en þá spilaði þessi líka snilldar hljómsveit. Ég var búin að biðja Ingólf og Svenna um þetta fyrir löngu en kvöldið fyrir veisluna þá bættist Óli við á trommurnar - þeir voru bara hreint út sagt æðislegur. Ég var í þvílíku stuði og ekki á því að fara heim. Það fóru nú flestir heim um leið og dansinn byrjaði - týpískir Íslendingar geta náttúrulega ekki dansað án áfengis. Fyrst fannst mér það pínu leiðinlegt en svo í lagi enda voru nú líka allir mínir bestu vinir (ungir og gamlir), foreldrar og systkini á staðnum þangað til ég fór (eða allt að því). Ég skemmti mér mjög vel og dró náttúrulega alla strákana (og mennina) sem eftir voru með mér út á gólfið. Ég kastaði vendinum bara alveg í endann og þá voru nú ekki nema svona 10 stelpur eftir. Það var samt alveg pínu stelpu fight. Erna sló fyrst í hann, svo Ása og að lokum hafnaði vöndurinn í höndunum á henni Þurí en hún gerði samt enga tilraun til að ná honum. Stebbi var nú ekki alveg að fíla það að 16 ára frænka hans skyldi hafa gripið vöndinn og það gerði þetta nú bara ennþá fyndnara :)
Kvöldið versnaði nú heldur ekki við það að koma heim. Við byrjuðum reyndar á því að láta nágranna okkar fyrir ofan nánast fá hjartaáfall en hann var ákkúrat að koma heim til sín þegar Elfar var að gera sig tilbúinn til að bera mig yfir þröskuldinn - sá var hissa :) Þegar inn var komið þá tóku m.a. á móti okkur blóm, sælgæti og jarðaber með súkkulaði á. Þegar betur var að gáð var líka búið að setja svona slakandi baðkúlur inn á bað. Þ.a. við Elfar byrjuðum á því að leggjast í bað, drukkum sprite í fínu brúðhjónaglösunum okkar og mötuðum hvort annað á jarðaberjum. Þetta var algjör draumur, sérstaklega þar sem ég var líka orðin ansi svöng enda fékk ég nú ekki mikinn tíma til að borða í veislunni. Já svo ætla ég nú ekki að fara út í nákvæmari lýsingar nema kannski að við opnuðum morgungjafirnar strax um kvöldið.Elfar klikkar ekki frekar en venjulega :)

Sunnudagur:
Við opnuð fullt af gjöfum (og þá meina ég fullt - þetta tók engan smá tíma) og tókum á móti nokkrum gestum sem voru að kveðja. Ég fór samt aldrei út náttfötunum :)

Takk allir fyrir allt - veislan var ekki bara persónuleg heldur tókst hún líka bara það vel og var það flott að það mætti halda að fagmenn hefðu séð um þetta allt. Lítið skipulag og góðir vinir og ættingjar er greinilega bara málið :)

þriðjudagur, júní 21, 2005